Հայաստանի պետական տնտեսագիտական համալսարանի Գյումրու մասնաճյուղը հանդես է գալիս հետաքրքիր նախաձեռնությամբ, որի շրջանակներում մարզի աշակերտները հնարավորություն ունեն մեկ օր հայտնվել ուսանողի կարգավիճակում, հասկանալ ուսանողական կյանքը, ընկալել բուհի միջավայրը:
Ծրագրի մեկնարկը տրվեց նախորդ տարի, ուսանողական շաբաթվա շրջանակներում հյուրընկալեցինք Գյումրու 18-րդ միջնակարգ դպրոցի աշակերտներին:
Շատ կարճ ժամանակահատվածում ծրագիրը բավականին հետաքրքրություն է առաջացրել դպրոցների շրջանում: Անցող շաբաթվա ընթացքում (փետրվարի 17-21-ը) բուհում հյուրընկալվեցին 4 դպրոցների 10-րդ և 11-րդ դասարանի մոտ 68 աշակերտներ:
Աշակերտներին նախ դահլիճում դիմավորեց ՀՊՏՀ ԳՄ տնօրենի պաշտոնակատար Կարեն Պետրոսյանը, ով հետաքրքիր զրույց ունեցավ աշակերտների մասնագիտական կողմնորոշման, սիրելի մասնագիտությամբ աշխատելու վերաբերյալ: Այնուհետև բուհի հանրային կապերի պատասխանատու Լենա Հովհաննիսյանը ներկայացրեց վերջին տարիների ձեռքբերումներն ու այն հնարավորությունները, որոնք ընձեռվում են աշակերտին ընդունվելով ՀՊՏՀ ԳՄ, որից հետո սկսվեց աշակերտների շրջայցը բուհում:
Առաջին կանգառը գրադարանում էր, որտեղ աշակերտները ծանոթացան տեղի գրականությանը:
Շարունակելով շրջայցը աշակերտները հյուրընկալվեցին ֆինանսատնտեսական բաժնում, որտեղ Արմենուհի Մինասյանը՝ աշակերտներին գործնականում ցույց տվեց , թե ինչպես են աշխատակիցներին ընդունում աշխատանքի, գրանցում տվյալներն ու թե ինչպես է հաշվարկվում աշխատավարձը:
Հաջորդ կանգառն ուսանողական խորհրդում է, որտեղ աշակերտները ջերմ միջավայրում զրույց ունեցան ուսանողական կյանքի վախերի ու հետաքրքիր օրերի մասին:
Բուհը ինչ կառույցների հետ է համագործակցում, ինչպես է հնարավոր կրթությունը շարունակել արտերկրում՝ դառնալով ՀՊՏՀ ԳՄ ուսանող, այս ամենի մասին աշակերտներին տեղեկություններ տվեցին ՀՊՏՀ ԳՄ գիտական քարտուղար-տնօրենի օգնական Արփինե Սարգսյանն ու ԶԾԳՈԱԱԿ բաժնի արտաքին կապերի մասնագետ Լուսինե Ասատրյանը:
Տեղեկատվական հանդիպումից հետո աշակերտներն արդեն լիիրավ մտան ուսանողի դերի մեջ, դեկանատում ծանոթացան ուսանողի իրավունքներին ու պարտականություններին, որից հետո մասնակցեցին ամբիոնի կողմից կազմակերպված կարճ դասընթացին: Որոշումների ընդունում ու կառավարում, տարբեր օրերի այս ամենի վերաբերյալ հետաքրքրիր դասընթացներ ունեցան ՀՊՏՀ ԳՄ դասախոսներ Հասմիկ Հակոբյանն ու Հայկարամ Դրմեյանը:
Շրջայցն ավարտվեց նոր ուսանողական ժամանցի կենտրոնում՝ «Օզոնում», որտեղ աշակերտներին ՀՊՏՀ ԳՄ 2-րդ կուրսի ուսանող Հակոբ Հակոբյանը ներկայացրեց, թե ինչպես է հնարավոր արդեն երկրորդ կուրսում ստեղծել բիզնես-քեյս ու հնարավորությունների գոտիներ ստեղծել երիտասարդների համար:
