Հայաստանի պետական տնտեսագիտական համալսարանի Գյումրու մասնաճյուղը կազմակերպում է «ՄՏԱԾՈՂ ԵՐԻՏԱՍԱՐԴՈՒԹՅՈՒՆ ֊ ՈՒԺԵՂ ՏՆՏԵՍՈՒԹՅՈՒՆ» խորագրով ներբուհական ուսանողական գիտաժողով:
Համավարակը խաթարել է ՀՀ տնտեսության բնականոն ընթացքը, վտանգված է երկրի ներքին և արտաքին տնտեսական կայունությունը: Անհերքելի է այն փաստը, որ մեծ ծավալի միջամտություն է անհրաժեշտ պաշտպանելու հասարակության խոցելի շերտերին, կանխելու գործազրկության աճը և արագացնելու տնտեսության վերականգնումը:
Վերոնշյալով պայմանավորված գիտաժողովի հիմնական նպատակն է՝ վերլուծել ՀՀ սոցիալ-տնտեսական իրավիճակը համավարակի պայմաններում, բացահայտել առկա հիմնախնդիրները, առաջարկել հնարավոր լուծումներ։
Գիտաժողովն ընդգրկում է հետևյալ ոլորտները՝
- Ժողովրդագրություն և սոցիալական հիմնախնդիրներ
- Արդյունաբերություն
- Գյուղատնտեսություն
- Զբոսաշրջություն
- Տեղեկատվական տեխնոլոգիաներ
- Ֆինանասաբանկային ոլորտ
- Ծառայություններ և առևտուր
- Կրթություն և գիտություն
- Հանրային կառավարում
Ելնելով առաջադրված նպատակից, անհրաժեշտ է ուսումնասիրել լուծում պահանջող մի շարք խնդիրներ, մասնավորապես`
- գնահատել ՀՀ սոցիալ-տնտեսական վիճակը, վերլուծել առկա հիմնախնդիրները և բացահայտել դրանց պատճառահետևանքային կապը հետպատերազմյան իրավիճակի և համավարակի հետ,
- բացահայտել բնակչության զբաղվածության աստիճանը, աշխատուժի առաջարկը և պահանջարկը, համավարակի ազդեցությունը գործազրկության վրա,
- բացահայտված հիմնախնդիրների վերացման ուղղությամբ կատարել գիտականորեն հիմնավորված առաջարկություններ:
Մասնակիցներ
Գիտաժողովին կարող են մասնակցել ՀՊՏՀ ԳՄ (ՀՊՏՀ բոլոր ստորաբաժանումների այդ թվում Ֆինանսատնտեսական քոլեջի) այն ուսանողները, ովքեր ունեն գիտական ղեկավարների / խորհրդատուների համաձայնությունը:
Գիտաժողովին մասնակցել ցանկացողները պետք է լրացնեն դիմում հայտ անցնելով հետևյալ հղմամբ:
Դիմում հայտի լրացման վերջնաժամկետն է ս/թ հուլիսի 10-ը:
Հոդվածների ներկայացման վերջնաժամկետն է ս/թ օգոստոսի 30-ը:
Գիտաժողովին ներկայացված աշխատանքները պետք է համապատասխանեն հետևյալ չափանիշներին.
- հայերենը՝ Sylfaen, անգլերեն և ռուսերենը՝ Times New Roman տառատեսակով (տառաչափը՝ 12, տողային հեռավորությունը՝ 1.5, ձախից՝ 3 սմ, աջից՝ 1.5 սմ, վերևից՝ 2 սմ, ներքից՝ 2 սմ, հղումները՝ տեքստում, հոդվածի վերնագիրը՝ մեծատառերով, 12 տառաչափով):
- Տողի կենտրոնում շեղատառերով տպել հոդվածի վերնագիրը, որից 2 տողաչափ ներքև՝ հեղինակի ազգանունն ու անունը, հաջորդ տողում՝ կազմակերպության անվանումը, իսկ 2 տողաչափ ներքև տեքստը` 1 սմ խորքից պարբերությամբ։
- Առանձնացնել հիմնաբառեր, վերջում` հայերեն, անգլերեն և ռուսերեն ամփոփում:
- Վերոնշյալ չափանիշներով տեքստը չպետք է գերազանցի 10 էջ ծավալը:
- Գիտական հոդվածը պետք է երաշխավորված լինի գիտական ղեկավարի կողմից:
- Պարունակի սպառիչ տեղեկություններ հեղինակ(ներ)ի մասին (ազգանուն, անուն, հայրանուն, էլեկտրոնային հասցե, հեռախոսահամար):
Մանրամասն տեղեկություններ ստանալու համար կարող եք դիմել ՀՊՏՀ ԳՄ ԶԾԳՈԱԱԿ բաժին` gmail: [email protected] :